Ntsib cov niam xibfwb……………

Ua Vajtswv tsaug uas Vajtswv foom koob hmoov ntau kawg li rau peb cov pawg ntseeg. Peb muaj cov ntseeg coob zuj zus tuaj thiab peb kuj muaj cov xibfwb thiab niam xifwb coob zuj zus ntxiv ua rau peb cov ntseeg paub tsis txhua peb cov xibfwb thiab niam xibfwb. Tshwj xeeb yog peb cov niam xibfwb. Cov xibfwb ces lawv kuj muaj sij hawm tawm mus sab nrauv mus ncig saib cov pawg ntseeg, ces cov ntseeg ho paub lawv zog. Cov uas yog niam xibfwb ces yeej tsis tshua tau mus qhov twg ntau. Nyias yeej nyob rau hauv nyias pawg ntseeg ntau xwb. Tsuas yog yus pawg ntseeg thiaj li paub yus xwb. Muaj ntau zaus, niam xibfwb thiab cov niamtsev twb mus kavkab kavkhw (tajlaj) ua ke, twb sib phoom, sib phoom, los twb tsis paub tias leej twg yog niam xibfwb nyob rau pawg ntseeg twg. Yog li, peb thiaj li xav tias cia peb qhia peb cov niam xibfwb rau sawv daws paub es tej thaum tau sib ntsib, los ho paub tias tus nov yog niam xibfwb, ob tug ua xibfwb nyob rau pawg ntseeg hu li nod. Es sawv daws thiaj paub sib hu. Txawm yog peb yog ib cov niam xibfwb los peb twb sib paub tsis txhua thiab. Peb ntseeg hais tias peb cov ntseeg yeej haj yam yuav tsis paub peb zoo yog peb tsis qhia peb tus kheej rau cov ntseeg.